ရာပြည့်၏ ဂီတ-ဘဝ အကျဉ်း

ခွန်အားဖြည့်မိငယ် ရာပြည့် (၁၉၇၇) ၊ ခင်မောင်တိုး (၁၉၈၁)

 ဂီတပညာရှင် ရာပြည့် (၁၉၅၅ - ၂၀၀၉)

၂၀၁၃ နှစ်ဦးကစလို့ မိုးမခ မှာ ဂီတပညာရှင်တွေ ရဲ့ ရုပ်ပုံလွှာတွေကို တတ်နိုင်သမျှ ပြုစုခဲ့တယ်။ အထူးသဖြင့် ကွယ်လွန်ပြီး စတီရီယို ခေတ်ပေါ် ဂီတ သမားတွေရဲ့ နှစ်လည်တွေမှာ သူတို့ အကြောင်း လက်လှမ်းမီသမျှ မှတ်တမ်းပြုရင်း မိုးမခ စာဖတ်ပရိသတ် အတွက် တင်ဆက်နိုင်ဖို့ ကြိုးစားခဲ့တယ်။  ဒီနှစ်မှာ ကျန်ခဲ့တဲ့ ပုဂ္ဂိုလ်များ ကိုလည်း နောင်နှစ်တွေမှာ လုပ်နိုင်ဖို့ မျှော်လင့်တယ်။ 

ဒီလို အစီအစဉ်တွေ လုပ်နိုင်ဖို့ အတွက် ဂီတအသိုင်းအဝန်း က ပုဂ္ဂိုလ်များကို ဆက်သွယ်ရ၊ စာမူတောင်းရ၊ ဓာတ်ပုံဟောင်းတွေ စုရ၊ သက်ဆိုင်ရာ သီချင်းတွေ ပြုလုပ်ရ၊ ကိုယ်တိုင် ရေးနိုင်တဲ့ အကြောင်းအရာ/လူပုဂ္ဂိုလ် ဆိုရင်လည်း ကိုယ်တိုင် ရေးရ ဆိုတော့ ပေးနိုင်သမျှ ကိုယ်ပိုင်အချိန်ကလေးတွေ အတွင်းမှာ အလျင်မမီနိုင် ဖြစ်ရတယ်။  လိုအပ်ချက်၊ အားနည်းချက်၊ အမှားအယွင်းတွေလည်း ရှိမှာပါပဲ။

ဒါ့အပြင် ဒီလို အစီအစဉ်တွေကိုပါ တွဲလုပ်ချင်တော့ တဖက်ကလည်း တခြား ဝါသနာ ပါ စူးနစ်ရာ အာသီသရှိ ရေးချင်တဲ့ နိုင်ငံရေး၊ လူမှုရေး၊ သမိုင်း၊ ပညာရေး၊ အားကစား၊ စီးပွားရေး နဲ့ မျက်မှောက်ရေးရာ ဆောင်းပါးတွေ ရေးဖို့ အားနည်း ခဲ့ရတာတွေ ရှိခဲ့တယ်။  အသံထွက်သင့်တဲ့ ကိစ္စ တချို့ အတွက် အသံထွက်ဖို့ ပျက်ကွက်ခဲ့ရတာတွေ ရှိခဲ့တယ်။

“…ရာသီစာ Cliché တွေနဲ့ ဟို သူ့ လွမ်း ဒီ သူ့ သတိရ Comfort Zone ထဲက ထွက်ခဲ့ကြပါလား။

ခင်ဗျား နေထိုင်တဲ့ လူ့အဖွဲ့အစည်းကြီးဟာ တကယ်တမ်း မယဉ်ကျေးလှပါဘူး။… လင်းထင်”

ဒီလို ပျက်ကွက် ရခြင်းဟာ အလိုမကျစရာ ပစ္စုပ္ပန် ကို ဖယ်ခွာချင်၊ ဝေဖန်သံ မညံရာ နေသားကျ အေးချမ်းရာ အရပ် အလွမ်းစာစု အပ်ကြောင်းထပ် “ကလီရှေး” တွေမှာပဲ ပုန်းလျှိုး ပျော်မွေ့ချင်တာလည်း ပါတယ် ဆိုတာ ဝန်ခံရပါမယ်။

ဒါပေမယ့် ဒီလို ဂီတ အနုပညာရှင်တွေကို တတ်စွမ်းသမျှ ပြန်လည် ဖော်ထုတ် မှတ်တမ်းပြုရခြင်း ရဲ့ အဓိက ရည်ရွယ်ချက်ကတော့ ရသ အနုပညာရဲ့ လူ့အဖွဲ့အစည်း အပေါ် သက်ရောက်တဲ့ စွမ်းပကား ကို ယနေ့ခေတ် လူငယ်များ မြင်စေချင်၊ အသိအမှတ်ပြုစေချင်လို့ပါပဲ။  နိုင်ငံတခု တည်ထောင်ရာမှာ ရုပ်ဝတ္ထုပစ္စည်းချည်း၊ အတတ်ပညာချည်းပဲ ဇောင်းပေးလို့ မရဘဲ လူတွေရဲ့ ကျင့်ဝတ်၊ သီလ၊ စိတ္တ အာဟာရ ကို ဖွံ့ဖြိုးစေတဲ့ ရသ အနုပညာ  ကဏ္ဍကိုလည်း အလေးဂရုပြုရပါတယ်။  

ဗမာပြည်ဟာ နိုင်ငံရေး စနစ်ဆိုး ဒဏ်ကြောင့် ရသ အနုပညာ ပိုင်းမှာလည်း ချို့ငဲ့ ခဲ့ပါတယ်။  ခေတ်သစ် ပန်းချီ၊ ကဗျာ၊ စာပေ၊ ဂီတ အစစ အရာရာ အားလုံး နောက်ကျခဲ့ပါတယ်။  နောက်ကျမှုက ရာစုနဲ့ချီကို နောက်ကျခဲ့တာတွေ ရှိပါတယ်။  ဒါပေမယ့် ဗမာပြည်က အနုပညာရှင်များဟာ အဖက်ဖက် မပြည့်စုံ ချို့တဲ့မှုတွေကြားက၊ အတား အဆီး၊ အပိတ်အပင်၊ အတိုက်အခံ၊ ဝေဖန်မှုတွေကြားက နိုင်စွမ်းသလောက် လူ့အဖွဲ့အစည်းအတွက် ဖြည့်ဆည်းပေးခဲ့၊ ပေးနေကြတယ်။  ဒီအထဲက ဂီတ အနုပညာရှင်တွေ၊ အထူးသဖြင့် မျက်မှောက်ခေတ် လူငယ်များ သိသင့်၊ သိထိုက်သူ၊ အသိအမှတ်ပြုသင့်၊ အားကျသင့်သူ ဂီတပညာရှင်တွေကို ပြန်လည် ဖော်ထုတ် မှတ်တမ်းတင်ခြင်းဟာ ကျနော့် ရဲ့ မိုးမခ ဂီတ ရုပ်ပုံလွှာ အစီအစဉ်တွေရဲ့ ရည်ရွယ်ချက်ပါပဲ။

တခြား သူများလည်း အတူတူပဲ ဖြစ်မယ်ထင်ပါတယ်။  ဘာပဲဖြစ်ဖြစ် ကျနော့် တဦးတည်းအတွက်နဲ့ပဲ ဆိုရရင် လက်ရှိ ဘဝမှာ နေထိုင် ကျင့်ကြံ၊ တွေးခေါ် ရပ်တည်နေတဲ့ ခံယူချက် အားလုံးဟာ ကျောင်းသင်ခန်းစာ ပြင်ပ ငယ်ဘဝ  တလျှောက် စားသုံးလာခဲ့တဲ့ စာပေ၊ ဂီတ ရသအနုပညာ ပစ္စည်းတွေ နဲ့ လိုက်စားလာခဲ့တဲ့ အားကစား ကနေ ရယူခဲ့ပါတယ်။  ကျနော် လက်ရှိ ရေးသားနေသမျှ အာဘော်တွေကလည်း ဒီ ကြားခံ ပစ္စည်းတွေကပဲ လာခဲ့တာပါပဲ။  ကျနော် ကျောင်းခန်းထဲမှာ လေ့လာခဲ့တဲ့ အဆင့်မြင့် သင်္ချာ ပညာ ရပ် ဟာ ဒုံးပျံတွေကို လွှတ်တင်ကောင်း လွှတ်တင်နိုင်ပါမယ်။  အသက်မွေးဝမ်းကြောင်းဖို့ လေ့ကျင့်ခဲ့တဲ့ ကွန်ပျူတာ အစီအစဉ်ရေးဆွဲမှု အတတ်နည်းပညာက လေယာဉ်ပျံကြီးတွေကို ထိန်းချုပ်ကောင်း ထိန်းချုပ်နိုင်ပါမယ်။  ဒါပေမယ့် ကျနော့် ကို လူသား တယောက်ရယ်လို့ ပီပီပြင်ပြင် ရှင်သန်၊ ရပ်တည်၊ နေထိုင်နိုင်ဖို့ ကြိုးစားချင်စိတ်ကိုတော့ စာပေ၊ ဂီတ နဲ့ အားကစား ကပဲ သင်ကြားပေးခဲ့ပါတယ်။

ဦးလတ်ကြီး သီချင်း အတိုင်း ဆိုရရင်တော့ ရာဇဝင် မဟာ သတ္တိတွေကို ဒီအထဲကပဲ ယူခဲ့ရပါတယ်။

ဒီသဘောကို လူအများ၊ အထူးသဖြင့် လူငယ်များ မြင်စေချင်၊ နားလည်စေချင်လို့ ဒီလို အမှတ်တရ စာစုတွေ၊ အလွမ်းတွေ၊ မှတ်တမ်းတွေ တနိုင် လုပ်နေခြင်းပါပဲ။

အထက်မှာ ကျနော့် ကို ကျင့်သားရ ပျော်မွေ့ရာ  Comfort Zone က နေ ထွက်ခဲ့ဖို့ သတိပေးခဲ့သူ ကိုလင်းထင် ရေးဖူးတဲ့ အကြောင်းအရာ ကလေးနဲ့လည်း  ဒီလို အစီအစဉ်တွေ လုပ်ရခြင်း သဘောကို ထပ်ဆင့် ရှင်းပြချင်ပါသေးတယ်။

သူ က ကျနော့်  ကို  လူ့အဖွဲ့အစည်းရဲ့ မျက်မှောက်ရေးရာ ပြဿနာ အစုစု အတွက် ကိုယ်ပိုင် အာဘော် အသံတွေ ပိုထွက်စေချင်လို့ အထက်ကလို သတိပေး တပ်လှန့်ဟန် တူတယ်။  ဒါပေမယ့် ဒီလို အစီအစဉ်တွေ၊ လွမ်းချင်းတွေရဲ့ သဘောကိုလည်း သူကိုယ်တိုင်လည်း နားလည်ပါတယ်။  ဟိုတလောက ပြည်တွင်း စာနယ်ဇင်း ဆောင်းပါးရှင် တယောက် ရဲ့ ဆေးလိပ်ဆန့်ကျင်ရေး ဆောင်းပါး မှာ ဆရာကြီး တင်မိုး ရဲ့ နာမည်ကျော် ကဗျာ “ဧည့်သည်ကြီး” ကို ယူသုံးပြီး ကဗျာရေးသူ မသိလို့ သိသူများ ပြောပြပါ ဆိုတဲ့ အသံ  ကြားရတော့ သူကိုယ်တိုင် ဘုရားတပြီး.. အောက်ပါ အတိုင်း ရေးခဲ့ဖူးတယ်။

“… တင်မိုးကို မသိတော့တဲ့ အန္တရာယ်ဟာ ဆေးလိပ် အန္တရာယ်အောက် မလျော့ဘူးလို့ ကျနော် တွေးနေမိတယ်။  တင်မိုးကိုမသိရင် ဇော်ဂျီ၊ မင်းသုဝဏ်ကို ဘယ်လိုသိမလဲ၊ ဒဂုန်တာရာကို ဘယ်လိုသိမလဲ၊ သခင်ကိုယ်တော်မှိုင်း ကို ဘယ်လိုသိမလဲ။  သူတို့ မပါတဲ့ ဗမာပြည်ဆိုရင် ၀ိညာဉ်မဲ့တဲ့ တိုင်းပြည် ဖြစ်သွားမှာပဲ၊ လူ့ရွာယောင် ဆောင်ရတဲ့ ကြတ်ကုန်းတစပြင်နှယ် ရှိမှာပဲ။

ကျနော် ယုံတာကတော့ လူတွေရဲ့ နေထိုင်မှု ဘ၀ဟန်ပန် ဆင့်ကဲ တိုးတက် ပြောင်းလဲတယ် ဆိုရာမှာ Humanity ဆိုတဲ့ တရားကိုယ် အကြောင်းကြီး ထင်ရှား ထွန်းကားပါမှ တာဝန်ယူ သိတတ်မှုတွေ မြင့်တက်လာရတာနဲ့ တိုက်ရိုက်အချိူးကျတာ ဖြစ်တယ်။

Humanity ဆိုတာ လူဖြစ်ရခြင်းရဲ့ အလင်းဘက်ခြမ်းက ကောင်းမွန်သော အရည်အသွေးကို ဆိုလိုတယ်။  ဂျက်လန်ဒန်ရဲ့ ပင်လယ်ဝံပုလွေထဲက ဇာတ်ကောင် ၀ံပုလွေလာဆင် နဲ့ ပုံဖော်ကိုယ်စားပြုတဲ့ တိရိစ္ဆာန်ဗီဇစိတ် အားလုံးကို ဖိနှိပ်ချူပ်တည်း အောင်နိုင်ထားတဲ့ လူသားရဲ့ ကောင်းမြတ်ခြင်းဘက် အခြမ်းက မျက်နှာစာ ဖြစ်တယ်။

ဒီ Humanity ကြီးထွားပါမှ လူဟာ မိမိကိုယ်ကိုယ် အပါအ၀င် ကိုယ်ရှင်နေရတဲ့ အ၀န်းအ၀ိုင်းပေါ်မှာ တာဝန်ယူလိုစိတ် ရှိလာမှာဖြစ်တယ်။  ဒီတာဝန်ယူစိတ်နဲ့ မကောင်းသော အကျင့်အကြံ ဘ၀ဟန်ပန်တွေကို စွန့်ခွာပစ်ကြတာပဲ။

စာရင်းအင်း အချက်အလက်တွေ၊ သိပ္ပံတွေ့ရှိချက်တွေ သက်သက်က ဒီ Humanity ထွန်းကားဖို့ အကောင်းတရားဘက်ဆီ မျက်မှောက်ပြုဖို့ တိရိစ္ဆာန် ဗီဇစိတ်ကို ဖိနှိပ်ဖို့ လှုံ့ဆော်နိုင်စွမ်း မရှိ၊ ၀ိညာဉ်မဲ့သူတို့ရဲ့ Manipulate လုပ်ခြင်းတောင် လူ့သမိုင်းမှာ ခံရသမို့ သမိုင်းယောင် သိပ္ပံယောင် (Pseudohistory and Pseudoscience) တွေနဲ့ အခိုင်အမာ ဆောက်တည်တဲ့ ဖက်ဆစ်ဝါဒလိုမျိူး ပေါ်ထွန်းခဲ့တာ မဟုတ်လား။

ဒီတော့ တင်မိုးကို ဘာလို့ သိရမှာလဲ၊ Humanity ထွန်းကားအောင်လို့။

လင်းထင်…”

ဆိုတော့ လူသား ရဲ့ အဓိပ္ပာယ်၊ ဖြစ်တည်မှု၊ လူသားဝါဒ ဗြဟ္မစိုရ် တရားထွန်းကားမှုမှာ ရသ အနုပညာ ရဲ့ အစွမ်း မရှမဖြစ် အရေးပါပုံကို ကျနော် တင်ဆက်နေတဲ့ အစီအစဉ် တွေကနေ မိုးမခ စာဖတ် ပရိသတ် အထူးသဖြင့် လူငယ် များ အနည်းငယ် ဖြစ်ဖြစ် သိမြင်နိုင်မယ်လို့ မျှော်လင့်ပါတယ်။

ဒါကတော့ ဂီတအနုပညာရှင်တွေရဲ့ အမှတ်တရ ရုပ်ပုံလွှာ အစီအစဉ်တွေရဲ့ သဘောကို နှစ်ကုန်မှာ အရှည် ရှင်းပြခြင်းပါ။

ဒီနေ့ အစီအစဉ်ကတော့ အမှန်က အရင် တပတ် က တင်ဆက်ဖို့ပါ။  အချိန်မပေးနိုင်ခဲ့လို့ နောက်ကျသွားခြင်းပါ။  ပြီးခဲ့တဲ့ ဒီဇင်ဘာ (၉) ရက်နေ့က ကွယ်လွန်ခြင်း (၄) နှစ်ပြည့်ခဲ့တဲ့ တေးရေး/တေးဆို ရာပြည့် နှစ်လည် အမှတ်တရ အစီအစဉ်ပါ။

၈၀ ခုနှစ်များ ၏ ဗမာ ကိုယ်ပိုင်သံစဉ် ဂီတလောကကို သိမ်းပိုက်ခဲ့သည့် ဂီတညီအစ်ကိုသုံးဦး “ခိုင်မိုးပြည့်”

ဝဲမှယာ - မိုးကျော်၊ ရာပြည့်၊ ခိုင်ထူး

ရာပြည့် ၏ ဂီတ ဘဝ အကျဉ်း

ရာပြည့် ကို အဖ ဦးဘာဘာ၊ အမိ ဒေါ်တင်တင်လှ တို့က ၁၉၅၅ ခုနှစ် ၌ မွေးဖွားခဲ့သည်။  သားအငယ်ဆုံး ဖြစ်ပြီး မွေးချင်းမောင်နှမ လေးယောက် ရှိသည်။ အမည်ရင်းမှာ ကိုတင့်လွင် ဖြစ်သည်။  ရာပြည့်သည် ၁၉၇၆ ခုနှစ် စစ်အာဏာရှင် ဆန့်ကျင်ရေး “မှိုင်းရာပြည့်” ကျောင်းသား အရေးတော်ပုံကြီးတွင် ပါဝင်လှုပ်ရှားခဲ့ပြီး နိုင်ငံရေးသီချင်းများ စတင်ရေးသားခဲ့သည်။  အရေးတော်ပုံကြီးအား ဂုဏ်ပြုသောအားဖြင့် အနုပညာ အမည်ကို “ရာပြည့်” ဟု ယူခဲ့သည်။

၁၉၇၇ ခုနှစ်တွင် သူငယ်ချင်းဖြစ်သူ သက်နိုင်ဦး (Richard) ၏ “ကြယ်ကြွေချိန် ညလေးတစ်ည” တေးစု ၌ ဧည့်သည် အဆိုအဖြစ် ဝင်ရောက် သီဆိုရင်း ဂီတလောက သို့ စတင်ဝင်ရောက်ခဲ့သည်။  ၁၉၈၀ ခုနှစ်များတွင် “သတိမမူဂူမမြင်” ၊ “နဒီမင်္ဂလာ” နှင့် “တစ်ကောင်တည်းပဲ ဒါပေမယ့် ခြင်္သေ့” တကိုယ်တော် တေးစု သုံးခု ဆက်လက်ထွက်ရှိနိုင်ခဲ့ပြီး အောင်မြင်မှု ရခဲ့သည်။ 

ရာပြည့်သည် တေးရေးဆရာ တယောက် အနေဖြင့်လည်း မြန်မာ ကိုယ်ပိုင်သံစဉ် ဂီတလောက၌ ထင်ရှားအောင်မြင်ခဲ့သည်။  သူငယ်ချင်းများဖြစ်သူ ခိုင်ထူး၊ မိုးကျော် တို့ဖြင့် “ခိုင်၊မိုး၊ပြည့်” ဟု သုံးယောက်တွဲ အနုပညာ နာမည် ယူကာလည်း ကိုယ်ပိုင်သံစဉ် တေးသီချင်းပေါင်းများစွာ စပ်ဆိုခဲ့သည်။  အဆိုတော် ခိုင်ထူး အတွက် ပထမ တေးစု (ရီဇော် နှင့်တွဲ) “တေးမြုံငှက် (၁၉၇၉)” ထွက်ရှိစဉ်ကတည်းကပင် တေးသီချင်းများ ရေးပေးခဲ့သည်။  ရာပြည့်သည် ခိုင်ထူး၊ မိုးကျော် အပြင် ကိုနေဝင်း၊ ကိုမောင်မောင်၊ ကိုရဲလွင် အစရှိသည့် မဇ္စျိမလှိုင်းအုပ်စု တေးရေးဆရာများ၊ အဆိုတော် မွန်းအောင်၊ စိုးလွင်လွင် တို့ ဖြင့်လည်း ဂီတလောကတွင် အတွဲများခဲ့သည်။

ရာပြည့် ရေး အောင်မြင်ကျော်ကြားခဲ့သော ကိုယ်ပိုင်သံစဉ် သီချင်းကောင်းများစွာအနက် “အဝေးဆုံး (စာသား - ရာပြည့် ၊ သံစဉ် - ခိုင်ထူး ၊ ခိုင်ထူး ဆို)”၊ “ချစ်ခြင်းရဲ့ အပြစ်ဒဏ် (ခိုင်ထူး ဆို)” “မကောင်းလည်းကိုယ် ကောင်းလည်းကိုယ် (ခိုင်ထူးနှင့် တွဲရေး ၊ ခိုင်ထူး ဆို)”၊ “(၈၄) ရက်စက်တယ် (သားထွေးနှင့် တွဲရေး ၊ ခိုင်ထူး ဆို)”၊ ”ခရေ (ကိုယ်တိုင် ဆို ၊ နောင် စိုးလွင်လွင် ပြန်ဆို)” “အမေ (စိုးလွင်လွင် ဆို ၊ နောင် ထူးအိမ်သင် ပြန်ဆို)”၊ သူငယ်ချင်းဖြစ်သူ မိုးကျော် အမှတ်တရ “တေးမြုံငှက်သို့ တမ်းချင်း” တို့ ဟာ အထူးပင် အောင်မြင်ကျော်ကြား လူကြိုက်များခဲ့သည်။

၁၉၈၈ ခုနှစ် “ရှစ်လေးလုံး” လူထုအရေးတော်ပုံကြီး အပြီးတွင် ပြည်ပ သို့ ထွက်ခွာသွားခဲ့ပြီး အမေရိကန်ပြည်ထောင်စု၌ အခြေချနေထိုင်ခဲ့၍ ဗမာ့ ဂီတလောက နှင့် အဆက်ပြတ်သွားခဲ့သော်လည်း ရာပြည့် သီဆို၊ ရေးသားခဲ့သော တေးသီချင်းကောင်း များစွာဟာ ပြန်လည် သီဆိုမှုများစွာဖြင့် ပြည်တွင်း၌ ဆက်လက်အောင်မြင်လျက်ပင် ဖြစ်ခဲ့သည်။

ရာပြည့်သည် အသက် (၅၄) နှစ်အရွယ် ၂၀၀၉ ခုနှစ် ၊ ဒီဇင်ဘာ (၉)ရက်နေ့တွင် အမေရိကန်ပြည်ထောင်စု ၊ ဆန်ဖရန်စစ္စကိုမြို့၊ ပြည်သူ့ဆေးရုံကြီး၌ ကွယ်လွန်အနိစ္စ ရောက်ခဲ့သည်။

မှတ်တမ်း စုဆောင်း အကျဉ်း ပြုစုသူ - ငြိမ်းချမ်းအေး

----

ကိုရာပြည့်က စာသားဘက်မှာ အားကောင်းတယ်။  စာသားတွေ ဘာတွေ ရေးပြီးတဲ့ အခါမျိုးကျရင် ပိုပို အဲဒါပဲလို့ ကျွန်တော့်ကို ချပြတဲ့အခါမျိုးမှာ ကျွန်တော်က ဒါကို သံစဉ်ထည့်ရမယ် ဆိုတာ မပြောဘဲနဲ့ နားလည်တယ်။  သီချင်း ဖြစ်လာတဲ့ အခါကျတော့ နှစ်ယောက်လုံး ရင်ထဲမှာ ဖြစ်လာတဲ့ ခံစားချက်ပေ့ါ.. ၊ ပျော်တဲ့ ခံစားချက်ပေါ့။ သီချင်းတပုဒ် ဖြစ်လာတဲ့ ခံစားချက်ပေါ့။  အဲဒါလေးအတွက်ပဲ သူနဲ့တွဲဖြစ်တာပါ။

ကိုမိုးကျော် မရှိတဲ့ နောက်ပိုင်း ကိုရာပြည့်ဟာ အဖော်မရှိသလို ဖြစ်နေတယ်။  ကိုမိုးကျော် အကြောင်းကို ပြောရင်းနဲ့ မိုးလင်းတဲ့ ရက်တွေအများကြီးပဲ။  သူရယ်၊ ကိုမိုးကျော်ရယ် ဂီတနဲ့ပတ်သက်ပြီး အရှေ့ကို ရည်ရွယ် မျှော်လင့်ထားတာတွေ အများကြီးရှိတယ်။  ကိုရာပြည့်က သဘောင်္လိုက်ပြီးတော့ ပိုက်ဆံရှာမယ်ပေါ့။  ရတဲ့ ပိုက်ဆံတွေနဲ့ လုပ်ဖို့ရှိကြတယ်။  ကိုမိုးကျော် မရှိတဲ့အခါကျတော့ ဒါတွေက မလုပ်ဖြစ်တော့ဘူး။  ကိုမိုးကျော် ဖြစ်ချင်တာတွေကို ကိုရာပြည့်က လုပ်မပေးလိုက်ရဘူး။  ကိုမိုးကျော်လို လူမျိုးက ရှိတော့မှာ မဟုတ်ပါဘူး။ သူမရှိတော့ ကိုရာပြည့်လည်း လုပ်ချင်တာလုပ်လို့မရတော့ဘူးပေါ့ဗျာ။

(ရေးဖေါ် နောင်တော် ဂီတ ညီအစ်ကို ရာပြည့်၊ မိုးကျော် အကြောင်း တေးရေး/တေးဆို စိုးလွင်လွင် (၁၉၆၂-၁၉၉၉) ပြောပြခဲ့သည့် အချက်တချို့ကို စိုးလွင်လွင် ၏ စာနယ်ဇင်း မေးမြန်းခန်း မှ ကောက်နှုတ်ချက်)

---

အခု ရာပြည့် အမှတ်တရ အစီအစဉ် အတွက် မိုးမခ ပရိသတ် နားဆင်ဖို့ သီချင်း စဉ်းစားတော့ ရာပြည့် ကိုယ်တိုင် ရေး/ဆို သီချင်းကောင်း အများအပြားကို အရင် စဉ်းစားမိပေမယ့်  ကိုနေဝင်း ရေး “ခွန်အားဖြည့်မိငယ်” သီချင်းကိုပဲ နောက်ဆုံး ရွေးဖြစ်လိုက်တယ်။  “ခွန်အားဖြည့်မိငယ်” ကို ရာပြည့် က သူ့ရဲ့ ဂီတ ဘဝအစ မှာပဲ လူမသိတသိနဲ့ သီဆိုခဲ့တယ်။  ဒါကြောင့် အမှတ်တရပြု ရွေးရခြင်း ဖြစ်တယ်။  ပြီးခဲ့တဲ့ စက်တင်ဘာ ၃၀ က အသက် (၆၃) နှစ်ပြည့် ခဲ့တဲ့ ဂီတစာဆို ကိုနေဝင်း (၁၉၅၀ ဖွား) ကိုလည်း တပါတည်း ဂုဏ်ပြုချင်တာလည်း ပါတယ်။  “ခွန်အားဖြည့်မိငယ်” သီချင်းကို နောင်ပိုင်း ခေတ်တလျှောက် ပရိသတ်များ အကြား အထူးရေပန်းစား ထင်ရှား အောင်မြင်အောင် သီဆိုသွားခဲ့တဲ့ မနှစ်ကပဲ ကွယ်လွန်ခဲ့ရှာသူ ဂီတပညာရှင် ခင်မောင်တိုး (၁၉၅၀-၂၀၁၂) ကိုလည်း အမှတ်တရ ထပ်မံ ပြုချင်တာလည်း ပါပါတယ်။

ဒါတွေအပြင် “ခွန်အားဖြည့်မိငယ်” သီချင်းဟာ လက်ရှိ ဗမာပြည် အခြေအနေနဲ့ ကိုက်ညီ၊ ပုံဖော် အားဖြစ်စေလို့ ရွေးရခြင်းလည်း ဖြစ်တယ်။  ၉၀ ခုနှစ်များ ဒေါ်အောင်ဆန်းစုကြည် နေအိမ်အကျယ်ချုပ် ကျခံနေရစဉ် အချိန်တွေမှာ နဝတ စစ်ဗိုလ်ချုပ်ကြီးတွေဟာ “ခွန်အားဖြည့်မိငယ်” သီချင်းကို အလာဂျီ ဖြစ် မျက်မုန်းကျိုးကာ တားဆီးပိတ်ပင်တာတွေ ရှိခဲ့ဖူးတယ်။  ယောက်ျား ဘသား စစ်ဗိုလ်ကြီးများ ကို အံတု နေသူ အမျိုးသမီးငယ် ကို အားဖြစ်စေတယ် ဆိုတဲ့ အတွေးနဲ့ပေါ့..။  အခုတော့ ခေတ်တွေလည်း ပြောင်းပြီလို့ ဆိုကြပါတယ်။  ဒေါ်အောင်ဆန်းစုကြည် တယောက်လည်း စစ်လွှတ်တော် ကို ရောက်ရှိလို့နေပါပြီ..။  သီချင်း အဆိုရှင် တဦးဖြစ်သူ ခင်မောင်တိုး ကိုယ်တိုင်လည်း “ခွန်အားဖြည့်မိငယ်”ကို ခေါင်းစီးတေး အနေနဲ့ မဆုံးခင် ၂၀၁၂ မှာပဲ နောက်ဆုံး သီဆို တေးစု ထွက်ရှိခဲ့တယ်။   

ဒါပေမယ့် မိငယ် ရင်ဆိုင် ရမယ့် လမ်းကြမ်းခရီးကတော့ မချောမွေ့၊ မဖြောင့်ဖြူးသေးပါဘူး။  ရင်ဆိုင်ရန် ခွန်အားတွေဖြည့်ဖို့ရာ ရှေ့ဆက် အများကြီးလိုနေပါသေးတယ်။  ဒီ “မိငယ်” ကတော့ လူဆိုးကြီးများရဲ့ စစ်အာဏာရှင် စနစ်ဆိုး ဒဏ်ကို အသွင်ပြောင်း ဆက်လက် ခံနေရဆဲ ဖြစ်တဲ့ ဗမာပြည် ဆိုတဲ့ “မိငယ်” ဖြစ်ပါတယ်။  

ငို့ဘသမား စစ်အုပ်စု ရဲ့ မတရားဖိနှိပ်နေဆဲ.. အန္တရာယ်.. ဓား.. တွေ.. အထပ်.. ထပ်.. ရှေ့မှာ ကာရံနေဆဲ ဖြစ်တာကြောင့် ဗမာပြည် ဆိုတဲ့ “မိငယ်” ဟာ ခွန်အားဖြည့်ဖို့လိုနေဆဲဖြစ်ကြောင်း မိုးမခ ပရိသတ်ကို နှိုးဆော် အသိပေးရင်း ရာပြည့် နှစ်လည် အမှတ်တရ အစီအစဉ် ကို “ခွန်အားဖြည့်မိငယ်” သီချင်းလေးနဲ့ နိဂုံးချုပ်လိုက်ပါတယ်။

ရာပြည့် သီချင်းများ ရှင်သန်စေ..။

ခင်မောင်တိုး သီချင်းများ ရှင်သန်စေ..။

ကိုနေဝင်း တယောက် ကျန်းမာစေ..။

ဗမာ့ ဂီတ ချမ်းသာစေ..။

(ဗမာပြည်ဆိုတဲ့…)

မိငယ် တယောက်လည်း ခွန်အားဖြည့်နိုင်စေ..။

နေဝင်ညကို.. ကူးဖြတ်ပြီးမှ.. ရောင်နီသာတဲ့.. နေ့သစ်ကို.. ရောက်မယ်..

ယုံကြည်ခြင်းနဲ့.. ကြိုးစားထားမှ.. တချိန်မှာ.. အောင်မြင်.. လွတ်မြောက်မယ်.. မဟုတ်လား..

သံသရာ.. လမ်းဟာ.. မချောမွေ့တတ်တော့.. တာဝန်ကိုယ်စီ.. အားတင်း.. ရှေ့ဆက်လှမ်း..

အရှုံးမပေးနဲ့.. မိငယ်ရေ.. ရဲရင့်မှ.. ကျော်ဖြတ်သွား..

အများ.. အကျိုး.. အတွက်.. တာဝန်..  ထမ်းရွက်တဲ့.. အခါ..

တကယ်.. ကိုယ်ကျိုး.. စွန့်နိုင်မှ..

ဒီရေ.. လှိုင်း.. တွေ.. တရိပ်ရိပ်.. တက်တော့.. ပင်လယ်ပြင်ဟာ.. လှုပ်ခတ်.. ရစမြဲလေ..

အန္တရာယ်.. ဓား.. တွေ.. အထပ်.. ထပ်.. ရှေ့က.. ကာရံ.. ကွယ်.. ၍.. တားဆီး.. နေပါစေ..

ဉာဏ်.. မြေကတုတ်ဟာ (မှာ).. စွမ်းအား.. သတ္တိ.. တမန်တော်ဟာ.. သတိတရား.. မင်း.. မမေ့နဲ့ဦး..

နေဝင်ညကို.. ကူးဖြတ်ရဲမှ.. ရောင်နီသာတဲ့.. နေ့သစ်ကို.. ရမယ်..

ယုံကြည်ခြင်းနဲ့.. ကြိုးစားထားမှ.. တချိန်မှာ.. အောင်မြင်.. လွတ်မြောက်နိုင်မယ်လေ..

သံသရာ.. လမ်းဟာ.. မချောမွေ့တတ်တော့.. ရင်ဆိုင်ရန်.. ခွန်အားဖြည့်.. မိငယ်.. ရေ..

သံသရာ.. လမ်းဟာ.. မချောမွေ့တတ်တော့.. ရင်ဆိုင်ရန်.. ခွန်အားဖြည့်.. မိငယ်.. ရေ..

ခွန်အားဖြည့် မိငယ် (Two Versions)၊ သံစဉ်/စာသား - ကိုနေဝင်း (မောင့်လပြည့်ဝန်း / မဇ္ဈိမလှိုင်း)၊ တေးဆို - ရာပြည့် (၁၉၇၇) ၊ ခင်မောင်တိုး (၁၉၈၁)

ရေးသားစီစဉ်တင်ဆက်သူ - ငြိမ်းချမ်းအေး

၁၆၊ ဒီဇင်ဘာ၊ ၂၀၁၃